Zëdhënësi i Kremlinit, Dmitry Peskov, e quajti retorikën e politikanëve polakë kundër Rusisë “armiqësore”, transmeton Anadolu Agency (AA).

Peskov tha se Polonia mund të përbëjë kërcënim për integritetin territorial të Ukrainës pasi zyrtarët polakë përmendin shpesh se një pjesë e territorit të Ukrainës përbëhet nga “toka historike polake”.

“Ka pasur një retorikë shumë armiqësore nga Polonia në muajt e fundit, ajo tradicionalisht nuk ka qenë miqësore për një kohë të gjatë, por në muajt e fundit është bërë armiqësore dhe fakti që Polonia mund të përbëjë një kërcënim për integritetin territorial të Ukrainës janë fakte të qarta”, tha Peskov.

Më herët, Shërbimi inteligjent i Rusisë pretendoi se Polonia mund të dërgojë trupat e saj në pjesën perëndimore të Ukrainës me pretekstin e ndihmës kundër “agresionit rus”.

Ndërkohë, presidenti i Bjellorusisë, Alexander Lukashenko, tha se Rusia, Ukraina dhe Bjellorusia më vonë mund të luftojnë së bashku kundër Polonisë për të rivendosur integritetin territorial të Ukrainës.

Zëdhënësi i Kremlinit nuk pranoi të komentojë deklaratën e presidentit bjellorus.

Tensionet janë rritur në Evropën Lindore pasi Rusia nisi një luftë kundër Ukrainës më 24 shkurt.

Vendet perëndimore dhe Bashkimi Evropian (BE) kanë vënë peshën e tyre pas Ukrainës dhe kanë vendosur një mori sanksionesh ndaj Rusisë, ndërsa fqinjët e Rusisë përpiqen të zgjedhin një anë.

Të paktën 3.280 civilë janë vrarë dhe 3.451 të tjerë janë plagosur në Ukrainë që nga fillimi i luftës me Rusinë më 24 shkurt, sipas vlerësimeve të OKB-së. Shifra e vërtetë dyshohet të jetë shumë më e lartë.

Më shumë se 5.7 milionë njerëz kanë ikur në vende të tjera, me rreth 7.7 milionë të zhvendosur brenda vendit, tregojnë të dhënat nga agjencia e OKB-së për refugjatët.